“БЭЛЧЭЭРИЙН МОНИТОРИНГИЙН ҮНДЭСНИЙ СҮЛЖЭЭНИЙ ТОГТВОРТОЙ ҮЙЛ АЖИЛЛАГААГ ХАНГАХ НЬ” СЭДЭВТ ХЭЛЭЛЦҮҮЛЭГ ЗОХИОН БАЙГУУЛАГДЛАА
Газар зохион байгуулалт, геодези, зураг зүйн ерөнхий газар, Дорнод Монголын хуурай хээрийн ландшафт, биологийн олон янз байдлын хамгаалал төсөлтэй хамтран Монгол орны бэлчээрийн газрын мониторингийн үндэсний сүлжээний үйл ажиллагааг сайжруулах, өнөөгийн байдал, бэлчээрийн доройтлыг бууруулах, цаашдын чиг хандлагыг тодорхойлох, салбар хоорондын болон орон нутгийн оролцоог нэмэгдүүлэх зорилготой “Бэлчээрийн мониторингийн үндэсний сүлжээний тогтвортой үйл ажиллагааг хангах нь” сэдэвт хэлэлцүүлгийг 2025 оны 04 дүгээр сарын 01-ний өдөр амжилттай зохион байгуулагдаж байна.
Тус хэлэлцүүлэгт БОУАӨЯ, ХХААХҮЯ, Цаг уур, орчны шинжилгээний газар, Үндэсний статистикийн хороо, Ус, цаг уур, орчны судалгаа, мэдээллийн хүрээлэн, Дорнод, Хэнтий, Төв, Сүхбаатар аймгуудын ГХБХБГ, МУИС, ХААИС, Газарзүй, геоэкологийн хүрээлэн, Мал аж ахуйн эрдэм шинжилгээний хүрээлэн, Монголын бэлчээр ашиглагчдын нэгдсэн холбоо, гадаад болон дотоодын төсөл хөтөлбөрүүд зэрэг нийт 28 байгууллагын 70 гаруй төлөөлөл оролцлоо.
Энэхүү хэлэлцүүлгийн зохион байгуулснаар бэлчээрийн мониторингийн тогтолцооны өнөөгийн байдал, цаашдын хөгжлийг тодорхойлох, холбогдох байгууллагуудын хамтын ажиллагааг өргөжүүлэх, бэлчээрийн доройтлыг бууруулахад шинжлэх ухааны үндэслэлтэй бодлого боловсруулах, шийдвэр гаргах түвшинд оролцогч талуудын санал, зөвлөмжийг хүргэхэд чухал ач холбогдолтой боллоо.
Хэлэлцүүлгийн үр дүнд оролцогчдоос дараах 4 үндсэн чиглэлийн хүрээнд санал, зөвлөмж гаргаж, холбогдох байгууллагуудад хүргүүлэх юм. Үүнд:
Бэлчээрийн газрыг хамгаалах, сайжруулах, нөхөн сэргээх, доройтлыг бууруулах чиглэлийн хууль, эрх зүйн орчныг сайжруулах;Бэлчээрийн фото мониторингийн үйл ажиллагааг сайжруулах;Газрын мониторингийн нэгдсэн мэдээллийн сан, цахим системийн өнөөгийн хэрэглээ, цаашид орчин үеийн техник, технологитой хослуулан сайжруулах, арга зүйг шинэчлэх;Салбар хоорондын уялдаа холбоо, бусад байгууллагуудын хамтын ажиллагаа.