ОЛОН УЛСЫН СИМПОЗИУМД ХИЙМЭЛ ОЮУН УХААНЫГ ХЭРХЭН АШИГЛАЖ БАЙГАА ТАЛААР ХЭЛЭЛЦЭЖ БАЙНА

НҮБ-аас БНХАУ-ын Санья хотод зохион байгуулагдаж буй “Уур амьсгалын өөрчлөлтөд дасан зохицох, тогтвортой хөгжилд зориулсан гео-орон зайн мэдлэг ба инновац” сэдэвт олон улсын симпозиум энэ өдрийн хурлаараа “Газар зохион байгуулалт, Уур амьсгалын өөрчлөлтөд дасан зохицох, Тогтвортой хөгжлийг дэмжихэд Гео Хиймэл оюун ухааныг ашиглах нь” сэдвээр үргэлжилж байна.

Хуралд зарим улс орнуудын Их сургууль, төрийн болон хувийн байгууллагын судлаачид дараах сэдвээр сонирхолтой илтгэл, танилцуулга хийлээ. Үүнд:

Нутаг дэвсгэрийн дийлэнх хувийг ой, уул эзэлж буй Хонг Конг улсад хиймэл оюун ухаан ашиглаж орон сууцны хороолол байгуулах боломжтой газар нутгийн судалгааг хийсэн жишээ;

Зайнаас тандан судлалын материал (сансрын зураг, дроны зураг)-ыг хиймэл оюун ухаантай хослуулан Африк тивийн томоохон нутаг дэвсгэрийг хамран нүүдэллэж буй заан, ордос үхэр гэх мэт амьтдын тооллого, судалгааг хийсэн жишээ;

Хиймэл оюун ухаан ашиглан уламжлалт газрын зургийг зургийг хэрхэн Уур амьсгалын өөрчлөлт, Гамшгийн эрсдлийн менежментийн зураг болгож ашиглаж байгаа жишээ;

Уур амьсгалын өөрчлөлтийн шийдвэр гаргахад ашиглах олон нийтэд зориулсан орон зайн мэдээлэл, бүтээгдэхүүн гаргаж буй жишээ;

Далайн эргийн тогтвортой менежментэд тандан судалгааны мэдээ ашигласан, мөн тандан судалгааны SAR мэдээ, Хиймэл оюун ухаан ашиглаж барилгын суултын судалгаа хийсэн г.м.

Мөн энэ өдөр НҮБ-ын Дэлхийн гео-орон зайн мэдээллийн менежментийн Ази-Номхон далай бүсийн хорооны Гүйцэтгэх зөвлөлийн болон хорооны 5 ажлын хэсгийн хурал 2026 оны 09 дүгээр сарын 23-ны өдөр зохион байгуулагдаж тус хорооны Гүйцэтгэх зөвлөлийн гишүүн, Газар зохион байгуулалт, геодези, зураг зүйн ерөнхий газрын дарга, удирдлагууд оролцлоо.

Газар зохион байгуулалт, геодези, зураг зүйн ерөнхий газрын дарга А.Энхманлай “Орон зайн мэдээллийг статистикийн мэдээлэлтэй нэгтгэх” ажлын хэсгийн хуралд оролцож НҮБ-ын Дэлхийн гео-орон зайн мэдээллийн менежментийн нэгдсэн гео-орон зайн мэдээллийн 9 хүрээ, Дэлхийн гео-орон зайн хүрээний 5 зарчмын хэрэгжилтийн үнэлгээний төсөлд санал өглөө.

Газар зохион байгуулалт, геодези, зураг зүйн ерөнхий газрын Орон зайн өгөгдөл, дэд бүтцийн газрын дарга Ж.Гал “Тогтвортой хөгжилд Гео Хиймэл оюун ухаан” ажлын хэсэг, Геодези, зураг зүйн хэлтсийн дарга Д.Мөнхцэцэг “Геодезийн тулгуур сүлжээ” ажлын хэсгийн хуралд Ажлын хэсгийн дэд даргын хувиар оролцож Монгол Улсад Хиймэл оюун ухаан, геодезийн сүлжээний нөхцөл байдлын талаар танилцуулж Ажлын хэсгийн 2026-2027 онд хийх ажлын төлөвлөгөөнийг төслийг хамтран боловсрууллаа