ЯПОН УЛСЫН "АSIA AIR SURVEY" ХХК-ИЙН ТӨЛӨӨЛӨГЧДИЙГ ХҮЛЭЭН АВЧ УУЛЗЛАА
Япон улсын "Asia Air Survey" ХХК-ийн төлөөлөгч Хасу Батору, менежер Шунсуке Томимура, Шиори Танигучи нарыг 2025 оны 04 дүгээр сарын 01-ний өдөр Газар зохион байгуулалт, геодези, зураг зүйн ерөнхий газрын дарга А.Энхманлай болон холбогдох албаныхан хүлээн авч уулзлаа.
"Asia Air Survey" ХХК нь агаар, сансрын зураг авч боловсруулан зам, гүүр, хотын зураглал, ойн зураглал, модны тооллого, усны хэмжилт зэрэг үндсэн үйл ажиллагаа явуулахаас гадна AAS Logger олон сувгийн бодит агшны GNSS хүлээн авагчийг үйлдвэрлэж хэрэглээнд нэвтрүүлсэн байна.
Тус компани Улаанбаатар хотод туршилтын журмаар GNSS-ийн байнгын ажиллагаатай станцыг Монмэп ХХК-тай хамтран суурилуулж, УБ хотын полигонометрын 3 цэг дээр статик, бодит агшны хэмжилт хийсэн нь байрлалын хувьд 2 мм, өндрийн хувьд 4 мм нарийвчлал хангасан талаар танилцуулав.
"Asia Air Survey" ХХК нь Бангладеш, Мьянмар, Камбодж зэрэг улсуудад Япон улсын хамтын ажиллагааны агентлаг (JICA)-ийн санхүүжилттэй Үндэсний орон зайн өгөгдлийн дэд бүтэц байгуулах төслүүд хэрэгжүүлж, тус улсуудад GNSS-ийн байнгын ажиллагаатай станцууд суурилуулж байсан туршлагатай бөгөөд Монгол Улсад ижил төстэй төсөл хэрэгжүүлэх боломжийг судлахаар хүрэлцэн иржээ.
Газар зохион байгуулалт, геодези, зураг зүйн ерөнхий газрын талаас Үндэсний орон зайн өгөгдлийн дэд бүтцийн суурь мэдээллийг нэгтгэх, засварлах, бусад байгууллагууд өгөгдлийг шинэчилж геопорталд оруулах, сургах чиглэлээр, мөн Монгол Улсад ажиллаж буй GNSS-ийн байнгын ажиллагаатай станцуудын тоог Засгийн газрын үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд тусгагдсаны дагуу нэмэгдүүлэх, онцгой байдалд буюу газар хөдлөлийг урьдчилан мэдээлэхэд ашиглах, AAS Logger багажийг аймгуудын ГХБХБГ-ын үйл ажиллагаанд ашиглуулах зэрэг чиглэлээр хамтран ажиллах боломжтойг цохон тэмдэглэв.
