ЯПОН УЛСЫН ГЕО-ОРОН ЗАЙН МЭДЭЭЛЛИЙН АГЕНТЛАГТАЙ ХАМТЫН АЖИЛЛАГААНЫ САНАМЖ БИЧИГ БАЙГУУЛЛАА

Газар зохион байгуулалт, геодези, зураг зүйн ерөнхий газар болон Япон улсын Гео-орон зайн мэдээллийн агентлаг хооронд хамтын ажиллагааны Санамж бичиг байгууллаа.

Энэхүү санамж бичгийн зорилго нь Монгол Улсын гравиметрийн сүлжээний эхлэл цэг (Gr0001) болон нэгдүгээр ангийн сүлжээний 2 (Gr0033, Gr0017) цэгийн хүндийн хүчний хурдатгалын үнэмлэхүй утгыг тодорхойлох явдал юм.

Гео-орон зайн мэдээллийн агентлагийн олон улсын стандартад нийцсэн абсолют гравиметрийн багажийг Монгол Улсад авч ирж Япон улсын мэргэжилтнүүд үнэмлэхүй утгыг тодорхойлох хэмжилтийг гүйцэтгэх ба манай улсын мэргэжилтнүүд хамтран ажиллаж энэхүү шинэ технологид суралцах юм.

Япон улсын Гео-орон зайн мэдээллийн агентлагийн Гадаад харилцааны газрын захирал Юдай Сато 2024 оны 08 дугаар сарын 20-ны өдөр хэмжилт хийх мэргэжилтнүүдийн хамт Газар зохион байгуулалт, геодези, зураг зүйн ерөнхий газрын дарга А.Энхманлайтай уулзаж хамтын ажиллагааны Санамж бичиг солилцлоо.